小街頭大人物: 瓊華倒數：「彌敦毛冷」（下）

「彌敦毛冷」離開了彌敦道，就已經不是「彌敦毛冷」了。

最忠誠的客人：斯里蘭卡華僑

四十年前，一位斯里蘭卡華僑腹大便便來到「彌敦毛冷」舊址買冷，為家人編織毛衣；四十年後，她從斯里蘭卡回港，想為四十歲的兒子再編織一件毛衣，同樣，她再回到「彌敦毛冷」。

「我哋做埋呢個月就搬啦！業主要收番間舖。」

「吓！咁你哋會搬去邊？我唔係好識其他地方架渣喎。」

老店舖，自然多老顧客。老顧客只會記得他們腦海中的「彌敦毛冷」，一個他們熟悉的地址與回憶。有時他們見面，可能不過是為了閒聊一句，抱怨一下生活艱難。就只短餖數分鍾交流，已夠「充滿電」，再返回自己的生活崗位繼續拚搏。

製衣熱至手作熱

四十年前，大陸開放，上海裁縫師傅來港，香港製衣工業發展蓬勃，帶挈毛冷生意。當年賣毛冷的熱潮，仿如今日內地人來港買金、買名牌，店鋪未開，「人龍」已出現於鋪前。「所以我哋以前好巴閉架，每人買冷係限額架！每人最多買四球冷，唔准買多！」；四十年後，香港工廠搬上大陸成潮，香港製衣業漸趨息微，賣毛冷的生意亦慢走下坡。

沒有了工廠、裁縫的購買力，編織毛衣的熱潮慢慢逝去，「彌敦毛冷」亦不免要改變銷售策略，迎合新客人。「宜家通常都係啲女朋友織比男朋友呀，男朋友又織番比女朋友呀，男朋友女朋友男朋友女朋友咁啦，但係我從來未見過有個係織比阿媽嘅。」廖小姐說笑間不自覺地分享了幾位「男、女朋友」向她學習編織毛衣的故事。

　　一位對編織毛衣毫無概念的男孩，決定為女友織一條頸巾，由低針學起。低針學成，再學高低針。後來織字、織花、織帽都沒有問題。某日，剛學織字的男孩終於在頸巾上成功織了第二隻字，興奮得立即在whatsapp通知廖小姐：「我織起左第2隻字la…=)」；一位本想學織娃娃的熟客，結婚時竟親手織了一對新娘新郎的娃娃。其後，客人甚至能夠織出白雪公主、鋼琴、芝士蛋糕等作品，全部都是獨一無二。

「宜家單純地賣毛冷已經唔得，一定要加啲手工藝元素，所以我一定要佢地自己返去試下自己織，織唔掂嘅就返嚟同你拆咗佢再織過。所以我宜家都不斷學習唔同嘅編織技巧，咁先可以教番啲客。慢慢客人自己夠能力去織到一啲獨一無二嘅作品出黎，滿足感就自然大，又會返嚟同我交流吓，我同啲客嘅關係就係咁樣建立出嚟。」